Sandiwara

Bisa wae pawongan sing mbokparabi kanca, nganggep kowe ora luwih saka beling-beling kaca sing tanpa guna

Bisa wae pawongan sing mbokparabi sedulur, nganggep kowe ora luwih saka sulur gulma rumambat sing kudu dijur 

Bisa wae pawongan sing  mbokanggep kanca, marabi kowe kadidene wanara ala sing cacat rupa

Bisa wae pawongan sing mbokanggep sedulur, marabi kowe kadidene bungur kebo kebak mala lan jamur

Ing donya iki pancen akeh wong sing paribasan menehi es degan nanging  diwales nganggo banyu korahan

Bisa wae pawongan sing tansah disubya-subya,  sejatine ora luwih saka ama sing dhemen nyebar pituna

Bisa wae pawongan sing katon ampuh lan pinter, sejatine ora luwih saka uwuh sing anggandha banger

Bisa wae pawongan sing tansah mesem sumringah, sejatine mendhem mawa panas mongah-mongah

Bisa wae pawongan sing katon necis mrebawani, sejatine akeh tumindak nalisir sing gawe giris lan nyiutake ati

Ing donya iki pancen akeh wong nyingidake raine sing wengis ing suwaliking topeng-topeng manis

Yogyakarta, 12062017

©NLS

Wong Wadon Kaya Babon

wong wadon kaya babon

ngemong anak-anake karo luru pangan turut kebon
rila kepanggang srengenge katimbang kakehan kasbon
wong wadon kaya babon
nasibe pancen ora tumon
sawise si jago kecanthol randha kidul protelon
uripe morat-marit kaya buruh di-PHK tanpa pesangon
wong wadon kaya babon
mrana-mrene kenyunyuk geni pasemon
ora sithik omongan sing nggatelake pangrungon
wong wadon kaya babon
tanpa rowang mecaki paiting lelakon
kesampar-kesimpir dadi guyon
nglenggana yen urip ora mung kebak gugon tuhon



Yogyakarta, Juni 2016

Bocah Ayu Kaya Asu

bocah ayu sing tindak-tanduke kaya asu
tansah tut wuri menyang ngendi wae bendarane mlaku
mokal njegog yen ora diganggu
sapari polahe mesthi gawe guyu
lulut lan lucu
bocah ayu sing tindak-tanduke kaya asu
prasetyane tan kena diwatesi wektu
nanging tetep ana sing tega ndadekake babu
apa saderma papan kanggo nyuntak hawa nepsu
nganti awak lan ati remuk rempu
bocah ayu sing tindak-tanduke kaya asu
sambat sebute ora ana sing maelu

Yogyakarta, Juni 2016

Aku Kepengin Mati

Aku kepengin mati, apa ana sing saguh mbiyantu?
Mati dudu perkara kang gampang kanggoku
Ngelingi yen isih ana wong-wong sing nresnani aku
Ngelingi utangku isih ana pirang-pirang ewu
Ngelingi yen amalku durung cukup kanggo sangu
Ngelingi wong tuaku mung duwe anak aku
Ngelingi dosa-dosa kang bakale ngrendhetake laku
Ngelingi yen panguripanku kayadene wadag tanpa nyawa, kaku
Aku kepengin mati, apa ana sing saguh mbiyantu? 

Gurit kanggo Sedulur(ku)

Aku njomblak, dikagetake dening apa sing taksawang ing sosial media

Kasusul klesak-klesike mbok bakul sinambi wara

Ndadekake aku nduweni panduwa ala

Blangkemen, angel kanggo ngrakit ukara

Ing atiku tuwuh pitakonan : saktemene ana apa?

Sedulurku, aku kepengin sliramu blaka suta

Geneya  kudu wedi marang titah sapadha?

Yen ing donya padha dene mung ngawula

Geneya  kudu dadi wong liya?

Yen mung amarga kepengin diakoni lan dipuja

 Sedulurku, yen iki perkara wigati lan mujudake wewadi

Bakal taksimpen kanthi premati

Nanging aku kepengin nyuntak apa kang dadi prenthuling ati

Geneya  kudu ngurbanake duwekmu sing paling aji?

Yen mung amarga ana salah sijining fobia sing blas ora mbejaji

Geneya kudu wedi marang sing nyebar pepati?

Yen kanthi mati sliramu isa nyuwarga ing panguripan sejati

Sedulurku, ora ana niyat nyampuri panguripanmu ing njaban rangkah

Apamaneh niyat nyecamah lan gawe pitenah

Aku ing kene kaya wong susah

Amarga apa sing saktemene dumadi pancen durung genah

Ora ngerti endi sing bener lan sing salah

Aku mung ora kepengin sikilmu luwih adoh jumangkah

Sedulurku, apuranen aku yen wis kuwawa gawe runtiking manah

Aku mung kepingin ngudal apa kang ndadekake wetengku sebah

Yogyakarta, 2 Februari 2016

Wandu

Aku duwe wadag lanang, nanging jiwaku wadon
Aku wis suwe duwe gegadhangan suntik silikon 
Lan dadi pegawe salon
Nanging ngasi seprene durung kelakon

Sabendina ibu ngundamana sinambi mecuca-mecucu
Ngarani yen aku dudu lanang, nanging wandu
Bu, apuranen yen aku saksuwene iki sesidheman nganggo gincumu
Pak, apuranen yen tindak-tandukku ketara wagu

Aku sakjane sedhih yen nyawang awakku nang kaca pangilon
Dhadhaku rata tanpa ana plenuke sepasang "balon"
Aku uga kepengin duwe jeneng singlon
Wis wegah maneh yen diceluk Jojon

Aku luwih seneng yen diparabi Mona
Ora suwe maneh aku bakal ngulambara
Wis ora kuwat urip kebak sandhiwara
Pak, Bu apuranen aku yen wis gawe cuwa

Yogyakarta, 19 Januari 2016

Aku

Aku dudu salah siji saka ewoning titah kang sampurna
Aku dudu salah siji saka ewoning wanodya kang nduweni budi utama
Aku mung salah siji saka ewoning pawongan kang seneng dora
Aku mung salah siji saka ewoning janma kebak dosa

Aku dudu salah siji saka ewoning anak-turun trah panguwasa
Aku dudu salah siji saka ewoning titisan brahmana
Aku mung salah siji saka ewoning rakyat jelata
Aku mung salah siji saka ewoning kaum sudra

Aku dudu salah siji saka ewoning ahli agama
Aku dudu salah siji saka ewoning wanita kang duwe pamikiran diwasa
Aku mung salah siji saka ewoning wadon kang duwe watak candala
Aku mung salah siji saka ewoning jalma kang seneng cidra, ngojahake tembung mawa wisa

Yen kabeh wong wis mangerteni sakabehing iku
Apa bakale isih ana sing tresna marang aku?



Yogya, 13 September 2015

Rodhaning Panguripan

Tunggak-tunggak jati kang mati

Tunggak-tunggak jarak kang mrajak

Kesingkur, kesikut, kepidak

Kasoran, kidonan, kudanan
Kasubya-subya, kondhang kaonang

Srengenge anyar wis jumedhul

Tunggak-tunggak jati semi

Kembang-kembang jarak alum

Thukuling wiji-wiji jati

Gogroging godhong-godhong jarak

Ora langgeng

Nalika angin kapitu tumiyup

Tunggak-tunggak jati mrajak

Tunggak-tunggak jarak mati

Yogyakarta, Agustus 2014

Pirsanana Putu-Putu Panjenengan, Mbah

Geguritan iki dakgawe nalikane aku melu lomba maca geguritan ing pengetan Dies Natalis UGM kang kaping-64 sasi Desember 2013 wingi. Nanging amarga ana tugas kuliah, aku wurung melu lomba kasebut(Hla njuk terus piye cuk?) Hahaha.

Pirsanana putu-putu panjenengan, Mbah
Sandhang panganggone sarwa gumebyar, ngumbar wewadi kang kudune tansah disingidake kanthi premati

Pirsanana putu-putu panjenengan, Mbah
Sing lagi kembul bojana adrawina, ngrahabi maneka warna jajanan saka negara manca, sarwa mirasa, nanging wis ora tepung karo thiwul apamaneh sega megana

Pirsanana putu-putu panjenengan, Mbah
Apal sakabehing tembang landa, nanging mung bisa pecuca-pecucu nalika ngumandhangake Indonesia Raya

Pirsanana putu-putu panjenengan, Mbah
Akeh sing wis padha lali purwa duksina, lali sakabehing pituturing wong tuwa

Keli kentir dening ilining banyu kamardikan, ora preduli budaya bangsa sing kagerus rodhaning jaman

Aku Bisa Edan

Aku suwe-suwe bisa edan

Urip ing donya tanpa panggaotan

Ora bisa nukokake susu si Kenang

Apadene nyaur utang

Aku suwe-suwe bisa edan

Sabendina dipilara dening juragan

Dadi pangewan-ewan

Kasampar sakparan-paran

Aku suwe-suwe bisa edan
Ora kumanan kabagyan
Sing dirasakake dening liyan
Mung bisa nangis kejer nggetuni kahanan

Aku suwe-suwe bisa edan
Urip mubra-mubru nanging tanpa rowang
Apadene sanak kadhang
Kayadene layangan tanpa cinancang
Kabur kleyang kanginan
Kijenan

Aku suwe-suwe bisa edan
Bisa wareg mangan
Nanging tansah ora nggawe kalegan
Sakdurunge duwe sedhan

Meneng kabeh!

Kowe, kowe, lan kowe kabeh, tansah elinga Gusti mesthi paring pangayoman

Pepadhang kanggo sing cedhak cecaketan

Ikhlas mring pawewehing ingkang Mahawikan

Jogja, 28 April 2014